لاہور: پاکستان تحریک انصاف (پی ٹی آئی) کے چیئرمین اور سابق وزیراعظم عمران خان عدالت پیشی کیلئے اپنی رہائش گاہ زمان پارک سے لاہور ہائیکورٹ روانہ ہوگئے۔سابق وزیراعظم عمران خان کی عدالت پیشی کے موقع پر سکیورٹی کے سخت انتظامات کیے گئے ہیں جبکہ پولیس کی اضافہ نفری بھی لاہور ہائیکورٹ پہنچ چکی ہے۔لاہور ہائیکورٹ روانگی سے قبل عمران خان نے اپنے قریبی ساتھیوں سے بات چیت میں کہا کہ جو حق سچ کے ساتھ ہوتا ہے اللہ اس کی مدد کرتا ہے، میرا مدد گار اللہ ہے، میں خدا کا شکر ادا کرتا ہوں جس نے اتنی عزت دی، میرے کارکن میرا سرمایہ ہیں، حق سچ کے ساتھ کھڑے کارکنوں کو دیکھ کر خوشی ہوتی ہے۔
خیال رہے کہ عمران خان نے 9 مقدمات میں حفاظتی ضمانت کیلئے لاہور ہائیکورٹ سے رجوع کیا ہے، عمران خان کی جانب سے اسلام آباد میں درج 5 مقدمات جبکہ لاہور کے تھانہ ریس کورس میں درج 3 مقدمات میں حفاظتی ضمانت کی استدعا کی گئی ہے، عمران خان کے خلاف لاہور کے تھانہ سرور روڈ میں بھی ایک مقدمہ درج ہے۔عمران خان کے خلاف مجموعی طور پر 6 مقدمات دہشت گردی دفعات کے تحت درج کیے گئے ہیں، دہشت گردی دفعات کے تحت 6 مقدمات کی لاہور ہائیکورٹ کا جسٹس طارق سلیم شیخ اور جسٹس فاروق حیدر پر مشتمل 2 رکنی بینچ سماعت کرے گا۔دیگر 3 مقدمات میں حفاظتی ضمانت کی درخواست پر جسٹس طارق سلیم شیخ بطور سنگل بنچ سماعت کریں گے۔
