اسلام آباد: فیڈرل بورڈ آف ریونیو (ایف بی آر) نے ریونیو کی کمی کو پورا کرنے کے لیے منی بجٹ کی تیاریاں شروع کردی ہیں۔مجوزہ پالیسی انفورسمنٹ اقدامات کی ایکسپریس نیوز کو دستیاب دستاویز کے مطابق انفورسمنٹ پالیسی اقدامات کے تحت ٹیکس نادہندگان کے اکاؤنٹس منجمد کرنے اور ان کی گاڑیاں اور جائیداد خریدنے پر پابندی عائد کرنے کا فیصلہ کیا گیا ہے۔لاکھوں ٹیکس چوروں کے بینک اکاؤنٹس منجمد کر دیے جائیں گے، جائیداد اور گاڑیوں کی خریداری پر پابندی عائد کر دی جائے گی اور بجلی اور گیس کے کنکشن منقطع کر دیے جائیں گے۔ یہ اقدام آئی ایم ایف کے 7 بلین ڈالر کے توسیعی فنڈ سہولت پروگرام کے تحت پہلی سہ ماہی (جولائی، ستمبر) کے ہدف کو حاصل کرنے میں ممکنہ بڑی کمی کے پیش نظر اٹھایا جا رہا ہے۔ایف بی آر نے جھوٹے یا نامکمل ٹیکس گوشوارے جمع کرانے والوں پر 10 لاکھ روپے جرمانے کی سفارش کی ہے جب کہ بینک اکاؤنٹس پر پابندی، گاڑیوں اور جائیداد کی خریداری پر پابندی اور بجلی کے کنکشن منقطع کرنے کی بھی تجویز دی گئی ہے۔ ان تمام سخت اقدامات کو پارلیمنٹ کے منظور کردہ منی بجٹ کے ذریعے ہی نافذ کیا جا سکتا ہے۔ حکومت کو ٹیکس قوانین میں ترمیم کے لیے مالیاتی بل پیش کرنا ہوگا یا ٹیکس مشینری کو وسیع تر اختیارات دینے کے لیے آرڈیننس نافذ کرنا ہوگا۔
