جن لوگوں کا سیاست میں کام نہیں وہ پھر بھی مداخلت کررہے ہیں:وزیراعلیٰ خیبر پختونخوا

پشاور:وزیراعلیٰ خیبر پختونخوا سہیل آفریدی نے کہا ہے کہ جن لوگوں کا سیاست میں کام نہیں ہے، وہ پھر بھی مداخلت کررہے ہیں۔خیبر پختونخوا میں ہر حال میں امن بحال کرینگے، بند کمروں کے فیصلے اب مزید قبول نہیں۔وزیراعلیٰ خیبر پختونخوا سہیل آفریدی پولیس فورس اور سول افسران کے مشترکہ دربار کی تقریب سے خطاب کر رہے تھے ۔تقریب میں چیف سیکرٹری، انسپکٹر جنرل آف پولیس، ایڈیشنل چیف سیکرٹریز، صوبائی محکموں کے انتظامی سیکرٹریز، ڈویژنل و ڈسٹرکٹ انتظامیہ کے افسران، پولیس افسران اور اہلکاروں کی بڑی تعداد بھی شریک تھی، اس موقع پر پولیس اور سول انتظامیہ کے شہدا کیلئے فاتحہ خوانی کی گئی۔ سہیل آفریدی نے کہا ہے کہ موجودہ حالات غیر معمولی ہیں، خیبر پختونخوا چار دہائیوں سے دہشتگردی کی زد میں ہے یہاں پولیس نے کم وسائل کے باوجود 21 سال دہشتگردی کا ڈٹ کر مقابلہ کیا ہے، دہشتگردی کیخلاف قربانیوں پر پوری قوم کو فخر ہے جس جوانمردی سے آپ دہشتگردوں کا مقابلہ کر رہے ہیں وہ قابلِ تحسین ہے، اللہ کی رضا اور عوام کے مفاد کیلئے لڑیں گے تو جیت ہماری ہوگی۔سہیل آفریدی نے کہا کہ پولیس کیلئے بلٹ پروف گاڑیاں، جدید اسلحہ اور اینٹی ڈرون سسٹم فراہم کیا جا رہا ہے۔جدید ترین ٹیکنالوجی ہنگامی بنیادوں پر دی جا رہی ہے وسائل کی کمی کو سکیورٹی کے راستے میں رکاوٹ نہیں بننے دیں گے۔انہوں نے کہا کہ شہید سول سرونٹس کے اہلخانہ کیلئے خصوصی پالیسی بنائی جائیگی اور افسران کے معاملات میں کوئی سیاسی مداخلت نہیں ہوگی مگر رزلٹ دینا ہوگا۔وزیراعلیٰ کا کہنا تھا کہ کرپشن کیخلاف زیرو ٹالرنس ہے کسی کو کوئی رعایت نہیں ہوگی عوام کیلئے اوپن ڈور پالیسی اپنائی گئی ہے سرکاری افسران کی کارکردگی پرفارمنس انڈیکیٹرز سے ناپی جائیگی۔ ایمان، حوصلے اور عزم سے دہشت گردی کو شکست دیں گے۔وزیراعلیٰ نے کہا کہ بد قسمتی سے جن لوگوں کا کام انصاف دینا ہوتا ہے وہ نہیں دے پاتے جس سے چیزیں خراب ہوتی ہیں، ہم نے عمران خان کے وژن کے مطابق عوام کو ریلیف دینا ہے، عوام کیلئے ہی فیصلہ سازی کرنی ہے۔