وفاقی حکومت نے پی ٹی آئی کے بانی عمران خان کے نیب ترمیمی کیس میں وکلا تک رسائی نہ دینے کے بیان کی تردید کردی۔ وفاقی حکومت نے پی ٹی آئی کے بانی عمران خان کے موقف کی تردید کے لیے اضافی دستاویزات عدالت میں جمع کرا دی ہیں، ان دستاویزات کے ساتھ عمران خان کی اڈیالہ جیل میں وکلا سے ملاقات کی تصاویر بھی شامل ہیں۔ سرکاری حکام کے مطابق پی ٹی آئی بانی کا قید تنہائی میں ہونے کا موقف بھی غلط ہے، ان سے ملاقات کرنے والوں کی فہرست بھی سپریم کورٹ میں جمع کرادی گئی ہے۔حکومت کا کہنا ہے کہ بانی پی ٹی آئی نے وکلا کو سپریم کورٹ میں رسائی نہ دینے کا موقف اختیار کیا ہے۔ حکومتی نمائندوں کے مطابق پی ٹی آئی بانی کو جیل میں کتابیں، ایئر کنڈیشنر اور ٹی وی سمیت تمام ضروری سہولیات فراہم کی گئی ہیں۔
