محسن نقوی نے عالمی تبلیغی مرکز رائیونڈ کا دورہ کیا اور تبلیغی جماعت کے علماء کرام مولانا احمد لاٹ، مولانا فاروق اور دیگر اکابرین سے ملاقات کی۔وزیراعلیٰ کو دین اسلام کی تبلیغ کے لئے سرگرمیوں کے بارے میں آگاہ کیا گیا، عالمی تبلیغی مرکز میں مسجد نبوی کے ماڈل پر 10 لاکھ نمازیوں کے لئے مسجد تعمیر کرنے کی تجویز بارے وزیراعلیٰ کو آگاہ کیا گیا، محسن نقوی نے مسجد کی تعمیر کے منصوبے میں تعاون کی یقین دہانی کروائی۔نگران وزیراعلیٰ پنجاب محسن نقوی کا کہنا تھا کہ تبلیغی جماعت دین اسلام کی تبلیغ کے لئے گراں قدر خدمات سرانجام دے رہی ہے، اللہ تعالیٰ کے دین کو پھیلانے والے دین اوردنیا دونوں کما رہے ہیں، اللہ تعالیٰ بھی نیک کام میں برکت ڈالتے ہیں، مسجد کی تعمیر کے حوالے سے محسن نقوی نے کہا اللہ تعالیٰ کے فضل و کرم سے اس تجویز پر ابتدائی بات ہوئی ہے، انشاءاللہ یہ نیک کام آگے بڑھے گا۔اس موقع پر مسجد کی تعمیر کے لیے نیت کرنے پر خصوصی دعا کی گئی، عالمی تبلیغی جماعت کے ڈاکٹر ندیم اشرف، امتیاز غنی، انوار غنی، میاں احسن، صوبائی وزیر اوقاف اظفر علی ناصر، گوہر اعجاز، کمشنر لاہورڈویژن اور دیگر اکابرین بھی اس موقع پر موجود تھے۔
