اسلام آباد:وزیرِ اعظم پاکستان شہباز شریف آذربائیجان کے صدر الہام علیوف کی دعوت پر 2 روزہ سرکاری دورے پر آذربائیجان کے لیے روانہ ہو گئے۔بدھ کو وزیراعظم آفس کے میڈیا ونگ سے جاری بیان کے مطابق وزیرِ دفاع خواجہ آصف، وفاقی وزیرِ تجارت سید نوید قمر، وفاقی وزیرِ اطلاعات و نشریات مریم اورنگزیب، وزیرِ مملکت برائے پیٹرولیم ڈاکٹر مصدق ملک اور معاونِ خصوصی طارق فاطمی بھی وزیرِ اعظم کے ہمراہ ہیں۔آذربائیجان میں وزیرِاعظم کی صدر الہام علیوف کے ساتھ ملاقات ہوگی۔ دونوں ممالک کے درمیان تجارت کے فروغ اور توانائی کے شعبے میں تعاون کے لیے وزیرِ اعظم سے آذربائیجان کے وزرا کے وفد کی ملاقات بھی ہو گی۔
