اسلام آباد: اعلیٰ عہدیداروں کے شدید دباؤ کے تناظر میں پی ڈی ایم حکومت کو اعلان کردہ پینشن اصلاحات سے پیچھے ہٹنا پڑا۔پینشن اصلاحات کے تحت گریڈ 17 اور اس سے اوپر کے دوبارہ بھرتی ہونے والے ملازمین سے کہا گیا تھا کہ وہ تنخواہ یا پینشن کی فراہمی کے لیے ایک پیکج کا انتخاب کریں۔ شدید مالی مشکلات کو مدنظر رکھتے ہوئے بیک وقت تنخواہ اور پینشن دونوں نکالنے کو ختم کرنے کا اعلان کیا گیا۔
اعلیٰ سرکاری ذرائع نے بتایا کہ ان تجاویز پر غور کیا جا رہا ہے جس کے تحت معاوضے اور تنخواہ کے ڈھانچے میں اضافے کے لیے انتظامی ادائیگی (ایم پی) اسکیل میں نظر ثانی کی جائے گی کیونکہ حال ہی میں آخری سبکدوش ہونے والی حکومت نے ریگولیٹری اداروں میں سے ایک میں اعلیٰ عہدے پر ایک ریٹائرڈ اہلکار کی تقرری کی منظوری دی۔ اعلیٰ ذرائع نے کہا کہ وزارت خزانہ کو ایم پی اسکیلز میں ترمیم کے لیے راضی کرنے کے پیچھے یہی عہدیدار ہے۔
