شارجہ: ٹی 20 ورلڈکپ کے کوالیفائنگ راؤنڈ کا آج آخری دن ہے۔ بڑے ایونٹ میں آج بھی دو میچز کھیلے جائیں گے۔ آئرلینڈ کا نمیبیا سے جبکہ سری لنکا کا نیدرلینڈز سے مقابلہ ہوگا۔
یاد رہے ٹی 20 ورلڈکپ میں اسکاٹ لینڈ نے عمان کو 8 وکٹ سے جبکہ بنگلادیش نے پاپوا نیو گینی کو 84 رنز سے ہرا کر سپر 12 میں کوالیفائی کرلیا۔
مسقط میں کھیلے گئے دن کے دوسرے میچ میں میزبان عمان نے اسکاٹ لینڈ کو 123 رنز کا ہدف دیا۔ جواب میں اسکاٹش کھلاڑیوں نے 17 اوور میں 2 وکٹ پر ہدف پورا کر لیا۔ کپتان کائل کوئٹزر کے 41 رنز کی ذمہ دارانہ اننگز سے جیت کا راستہ آسان ہوا۔
اس سے پہلے ہائی اسکورنگ میچ کھیلا گیا۔ بنگلا دیش نے جارحانہ انداز اپناتے ہوئے مقررہ 20 اوور میں 7 وکٹ پر 181 رنز جوڑے، کپتان محمود اللہ 50 رنز کے ساتھ ٹاپ اسکورر رہے۔
بنگلادیشی تباہ کن بولنگ کے باعث پاپوا نیو گینی 97 رنز پر ڈھیر ہوگئی، 9 بلے باز ڈبل فگر میں نہ جا سکے۔ آل راؤنڈر شکیب الحسن کو 46 رنز اور چار وکٹیں حاصل کرنے پر پلیئر آف دی میچ ایوارڈ دیا گیا۔