اسلام آباد: پاکستان پیپلز پارٹی کے سیکرٹری جنرل نیئر بخاری نے اڈیالہ جیل میں پاکستان تحریک انصاف (پی ٹی آئی) کے بانی کو دستیاب سہولیات کا نوٹس لینے کا مطالبہ کردیا۔نیئر بخاری نے اپنے بیان میں کہا کہ بانی پی ٹی آئی کو جیل مینوئل کے علاوہ اضافی سہولیات فراہم کی جارہی ہیں، کیا کسی قیدی کو پیدل چلنے کے لیے ایکسرسائز مشین اور گیلری فراہم کی جاتی ہے؟انہوں نے کہا کہ بانی پی ٹی آئی کو جو سہولتیں دی جارہی ہیں کیا وہ جیل مینوئل کے مطابق ہیں؟ اڈیالہ جیل وزارت داخلہ کے ماتحت ہے لہٰذا وزیراعلیٰ پنجاب مریم نواز معاملے کا نوٹس لیں۔سیکرٹری جنرل پیپلز پارٹی نے کہا کہ مریم نواز سہولیات کی فراہمی سے متعلق وزارت داخلہ سے پوچھیں، جیل مینول کے مطابق بی کلاس میں یہ سہولت نہیں، سپریم کورٹ میں جمع کرائی گئی رپورٹ سے انکار نہیں کیا جا سکتا۔گزشتہ روز سپریم کورٹ میں نیب ترمیمی کیس کی سماعت کے دوران وفاقی حکومت نے بانی پی ٹی آئی کو جیل میں موجود سہولیات کی دستاویزات اور تصاویر جمع کرائی تھیں۔دستاویزات کے مطابق سابق وزیراعظم کو جیل میں کتابیں، ایئر کولر، ٹی وی سمیت تمام ضروری سہولیات فراہم کی گئی ہیں۔
