تہران: ایران کے سپریم لیڈر آیت اللہ خامنہ ای نے سپریم نیشنل سیکیورٹی کونسل کے ہنگامی اجلاس میں حماس کے رہنما اسماعیل ہنیہ کی شہادت کا بدلہ لینے کے لیے اسرائیل پر براہ راست حملے کا حکم دیا ہے۔
امریکی اخبار نے اپنی خبر میں دعویٰ کیا ہے کہ ایران کی سپریم نیشنل سیکیورٹی کونسل کا یہ اجلاس اسماعیل ہنیہ کی شہادت کے فوری بعد ہنگامی طور پر بلایا گیا تھا۔واضح رہے کہ ایرانی سرزمین پر حماس کے رہنما اسماعیل ھنیہ کی شہادت پر ایرانی سپریم لیڈر آیت اللہ خامنہ ای نے اپنے ردعمل میں کہا تھا کہ ہمارے گھر میں ہمارے مہمان کو شہید کیا گیا، شہید کا بدلہ لینا تہران کا فرض ہے۔حماس کے سیاسی شعبے کے سربراہ اسماعیل ہنیہ گزشتہ روز تہران میں میزائل حملے میں اپنے ایک محافظ سمیت شہید ہو گئے۔ایرانی ٹی وی کی رپورٹ کے مطابق اسماعیل ہنیہ تہران میں نومنتخب ایرانی صدر کی تقریب حلف برداری میں شرکت کے بعد اپنی رہائش گاہ پر پہنچے ہی تھے کہ یہ حملہ ہوا۔
